એક પુરુષ ખરીદવો છે મારે

મેં જોયો

બજારમાં એક પુરુષને, એક સ્ત્રી ખરીદતાં

મારે પણ ખરીદવો છે, એક પુરુષ

સાફ દાઢીમૂછ, ચોખ્ખા કપડાં, ઓળેલા વાળ

શરીર અને સ્નાયુઓ દેખાય એમ મુકાયો હોય જે

મુખ્ય માર્ગ પર, વેચાવા

તેને કોલરથી ખેંચી

રિક્ષામાં ફેંકવો છે

તેની ગરદન, પેટ અને છાતીમાં આંગળીઓ નાખી

ઘેર લાવી પટકવો છે પથારીમાં

ને પેટ ભરાય એટલે

એડીવાળાં સેન્ડલથી ફટકારી, ગંદી ગાળો દઈ

હડસેલી મૂકવો છે: ‘ચાલ ફૂટ… તારી જાતના…’

માથા પર મેલો પાટો બાંધી

ચામડી ખણતો

સવારે તે ઝોકાં ખાતો હશે શેરીમાં

કૂતરાં તેના જખમ પરથી ફૂટતાં લોહીપરુ ચાટતા હશે

ને જતી આવતી સ્ત્રીઓ, બંગડીઓ રણકાવતી

અટ્ટહાસ્યથી ગલી ગજવતી જશે

સાચે જ

એક પુરુષ ખરીદવો છે મારે

તાજો, તંદુરસ્ત, છાતી પર વાળવાળો

તેને મસળી કચડી છૂંદી લાત મારી નાખી દેવો છે બહાર

ને બરાડવું છું: ‘મોં કાળું કર, ચાલ્યો જા, હરામી!’

તસલીમા નસરીન ( -અનુ. સોનલ પરીખ)